كرة القدم
2020-11-26

كرة القدم

المقالة

تعرفوا إن فيه فى العالم ٢.٤ بليون مسيحى، و ١.٨ بليون مسلم، و ١.٢ لادينيين، و ١.١٥ بليون هندوس و ٠.٥ بليون بوذى؟

بس الرقم الأكبر من الأرقام دى هو عدد مشجعين كرة القدم اللى بيوصل تعدادهم ل ٣.٥ بليون مشجع فى كل أرجاء العالم!

ليه الناس بمختلف عقائدهم الدينية والروحية اتفقوا على حب كرة القدم؟!

علشان كرة القدم بتمثل كل ما هو مثالى فى منظومة حياتنا..

فعلا؟! طب نشوف...

1. الهدف

كل فريق بيلعب له هدف واحد بس، وهو ٣ نقاط بتوع الماتش.. هاتختلف استراتيجية وطريقة لعبهم بس الكل هدفه واحد.. الوصول لمرمى الخصم، إحراز هدف، والفوز بال ٣ نقاط.. هدف واضح ومحدد.

2. الإلتزام

كل واحد من الفريق عارف بالظبط دوره فى الملعب، ومكانه، وطريقة لعب زميله اللى جانبه، والكل ملتزم بالدور ده ولازم يؤديه بأحسن ما يمكن علشان تحقيق هدف الفريق.

3. الوقت

الوقت محدد، ولا مجال لتضييعه، حتى الوقت الضائع بيتعوض فى آخر كل شوط.. لا مجال لإهدار الوقت.

4. تقبل المخاطر

لما بيكون الوقت اللى فاضل بسيط، ومعدش عندك حاجه تخسرها، الفريق بيهاجم بكل خطوطه فى محاولة أخيرة لتحقيق الهدف المرجو، مع إن ده فيه مخاطرة، بس كتير بتكون وسيلة لإدراك ما فات.

أحيانًا بتظبط، وأحيانًا بتفشل.. بس هى دى متعة كرة القدم.

5. تحمل المسئولية

لما الفريق بيفشل فى تحقيق هدفه، بيخرج مدرب الفريق ويتحمل مسئولية الفشل ده، حتى لو التقصير كان من بعض اللاعبين، بس فى الأول وفى الآخر هى دى خطته وهى دى خياراته.

6. تطوير الذات

المثال الأوضح فى النقطة دى هو محمد صلاح، ورحلة نجاحه من المقاولين لواحد من أفضل ٣ لاعبين فى العالم.

ماكانتش صدفة أبدًا، تطوير الذات هو المفتاح.

7. المحاولة

لما بنلاقى الأهلى بيلعب ويجيب جون فى الدقيقة ٩٤ ولما نلاقى برشلونه بيعمل ريمونتادا مع باريس سان جيرمان علشان يعدل نتيجة مستحيل كان حد يتوقع تحقيقها، ده يعلمنا إن المحاولة لتحقيق الهدف لازم تستمر حتى آخر لحظة.

8. مبدأ الثواب والعقاب

الفريق لما بيحقق الهدف بيتم مكافئته، وأحسن لاعب فى المباراة بياخد جائزة خاصة، وكمان أنضف لعب وهداف البطولة.

واللاعب أو النادى مهما كان كبير وأخطأ لازم يتم عقابه.

سنة كونية هى مبدأ الثواب والعقاب.

9. روح الفريق

فرق كتير مافيهاش نجم سوبر وحصدت ألقاب عالمية، زى اليونان لما فازت بأمم أوروبا، على النقيض لما بنلاقى فريق معتمد على لاعب واحد أو اتنين مابيوصلش لهدفه.

علشان الأسباب دى كلها، بنلاقى إن كرة القدم هى مثال واضح لوضوح الهدف والطريق المثلى لتحقيقه

منقول بتصرف من TEDx SHA

دمتم بخير